Всех поздравляем с праздником!
Молитв и предстательства преподобной матери нашей Параскевы, игумении Топловской!
Тропарь преподобной Параскеве, гл.4
Преподобная мати наша Параскево, богатство и славу мира сего презрела еси, измлада уневестилася еси краснейшему паче всех Христу, крест вземше и с него даже до смерти не сшедше. Чистоту душевную и телесную Господеви в дар принесла еси, безкровными страданьми Ему угодила еси: в Небесней обители ныне пребываеши, поминай нас, чтущих славную память твою.
Кондак преподобной Параскеве, гл.2
Во обители Топловстей вселилася еси, Параскево блаженная, мирский мятеж и человеческое лукавство презрела еси. Темже и Бог превознесе тя во времена лютых гонений. Укрепи малодушныя и загради уста хулящих Святую Церковь, от всяких находящих зол избави нас молитвами твоими, со умилением зовущих: Радуйся, похвало земли нашея и утверждение.
МОЛИТВА святой преподобной Параскеве, игумении Топловской
О преподобная и всехвальная мати наша Параскево, доблественная исповеднице Христова, монашествующих славо и утверждение, обители сей и всему отечеству нашему помоще и покрове. Смиренно припадающе к раце мощей твоих молимся ти с любовию прилежно: не забуди убогих чад твоих, буди с нами во всех путех наших; огради нас верою, недеждою, любовию и страхом Божиим, подаждь помощь в трудех, утешение в скорбех : и якоже имела еси в житии твоем попечение о обители сей и всяком приходящем под покров ея тако и ныне всех зде молящихся тебе огради миром и защити от враг видимых и не видимых, да преуспеем и процветем в добродетелех. Достойный путь монашеского жития совершивши -умоли Всеблагаго Христа Бога нашего да укрепит нас в подвизех иноческого делания достойне пребывати-тщанием неленностным , духом горяще, Господеви во смирении и кротости служаще, в молитвах не усыпающе; в мире благочестно живущим низпосли молитвами твоими в вере твердость, во благом делании постоянство, в скорбех утешение, в малодушии укрепление.Не устрашимся же гонений и живот не пощадим веры ради православныя, богоносными словесы завещания твоего укрепляеми, сподобимся же в мире и покаянии земное поприще преити и добраго ответа на Страшнем судищи Христове получити, в велицей радости славя Пресвятое имя Отца и Сына и Святаго Духа. Аминь.
СВЯТАЯ ПРЕПОДОБНАЯ МАТИ НАША ПАРАСКЕВО, МОЛИ БОГА О НАС!